अमेरिकेत बेकायदा वास्तव्य; ११ भारतीय विद्यार्थ्यांना अटक

वॉशिंग्टन: अमेरिकेत बेकायदा वास्तव्य केल्याप्रकरणी १५ विद्यार्थ्यांना अमेरिकेच्या इमिग्रेशन अॅण्ड कस्टम्स एनफोर्समेंट (आयसीई) प्रशासनाने अटक केली असून यामध्ये ११ भारतीय विद्यार्थ्यांचा समावेश आहे. या विद्यार्थ्यांना बोस्टन, वॉशिंग्टन, ह्युस्टनसह अन्य शहरांतून बुधवारी अटक करण्यात आली. यामध्ये भारतीय विद्यार्थ्यांसोबत लिबियाचे दोन, सेनेगल आणि बांगलादेशच्या प्रत्येकी एका विद्यार्थ्याचा समावेश आहे. ही अटक 'ऑप्टिकल इल्युजन' मोहिमेचा एक भाग आहे. या अंतर्गत विदेशातून आलेल्या 'ऑप्शनल प्रॅक्टिकल ट्रेनिंग' (ओपीटी) कार्यक्रमाचा बेकायदा वापर करून अमेरिकेत राहणाऱ्या विद्यार्थ्यांवर नजर ठेवली जात आहे, असे आयसीईच्या अधिकाऱ्यांनी सांगितले. ओपीटीअंतर्गत विदेशी विद्यार्थ्यांना त्यांच्या शिक्षणाशी संबंधित क्षेत्रात अमेरिकेत एक वर्षापर्यंत काम करण्याची परवानगी मिळते. जर विद्यार्थी 'एसटीईएम' पर्यायी प्रॅक्टिकल प्रशिक्षणात सहभागी झाला तर त्याला आणखी २४ महिने देशात काम करण्याची संधी दिली जाते. या अटक करण्यात आलेल्या विद्यार्थ्यांनी अस्तित्वात नसलेल्या कंपन्यांमध्ये काम करत असल्याचा दावा केला होता. वाचा: वाचा: ट्रम्प प्रशासन अमेरिकेला अव्वलस्थानी नेत आहे. शिवाय इमिग्रेशन यंत्रणेच्या कायद्यांची अंमलबजावणी होत आहे की नाही, याची खात्रीही करून घेत आहे, याचे हे दुसरे एक उदाहारण, असे कार्यवाहक उपसचिव केन क्युसिनेली यांनी सांगितले. आयसीईकडे फसवणूक कमी करण्यासाठी तपासणी करणारी यंत्रणा आहे. विद्यार्थी, अभ्यांगता आणि शाळा अमेरिकेच्या परदेशी वास्तव्याच्या कायद्याचे पालन करत असल्याचे सुनिश्चित करून राष्ट्रीय सुरक्षेचे संरक्षण करण्यासाठी आयसीई कटिबद्ध आहे, असे आयसीईचे वरिष्ठ अधिकारी टॉनी फाम यांनी सांगितले.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/34pZZOd