करोनाने गंभीर आजारी असलेल्यांवर 'ही' लस १०० टक्के परिणामकारक!

न्यूयॉर्क: 'मॉडर्ना' कंपनीने बनवलेली करोनावरील लस ९४.१ टक्के यशस्वी झाली असून, त्याचे कोणतेही दुष्परिणाम पेशंटवर दिसत नसल्याचा दावा कंपनीने केला आहे. गंभीर रुग्णांसाठी तर ही लस शंभर टक्के गुणकारी असल्याचे कंपनीने म्हटले आहे. अमेरिकेत आणि युरोपात ही लस वितरित करण्यासाठी कंपनी लवकरच यंत्रणेकडे अर्ज करणार असल्याचेही सोमवारी स्पष्ट करण्यात आले. 'यूएस फूड अँड ड्रग्ज अॅडमिनिस्ट्रेशन' आणि 'इमर्जन्सी यूज ऑथरायजेशन' या दोन्ही यंत्रणांसोबत कंपनी सध्या चर्चा करीत असून, लवकरच ही लस वितरित करण्याच्या हालचाली सुरू होतील, असेही सांगण्यात आले. कंपनीचे सीईओ स्टीफन बन्सल म्हणाले, 'आमच्या कंपनीकडून तयार करण्यात आलेली लस करोना साथरोगाचा प्रसार निश्चित थांबवेल. करोनामुळे होणारी रुग्णांची परवड, रुग्णालयात होणारा खर्च आणि करोनामुळे होणारे मृत्यू अशा तिन्ही गोष्टी या लसीमुळे आटोक्यात येतील, असा आम्हाला विश्वास आहे.' 'मॉडर्ना'च्या लशीचे दोन डोस अमेरिकेतील लाखो नागरिकांना डिसेंबर महिन्याच्या मध्यापर्यंत दिले जातील, असे सांगण्यात आले आहे. वाचा: अमेरिकेतील आणखी एक कंपनी फायझर आणि जर्मनीची बायोटेक या कंपन्यांनीही लशीसाठी गेल्या आठवड्यात अर्ज केले असून, दहा डिसेंबरनंतर याबाबत पुढील कार्यवाही होणार आहे. 'मॉडर्ना'ने ही लस अमेरिकेच्या आरोग्य विभागाच्या राष्ट्रीय संस्थेसोबत विकसित केली असून, ३० हजार जणांपेक्षा जास्त जणांना ही लस देण्यात आली आहे. वाचा: वाचा: 'नाकावाटे करोना मेंदूपर्यंत' करोनाचा विषाणू नाकावाटे थेट मेंदूपर्यंत जातो आणि संपूर्ण शरीरावर परिणाम करतो, असे निरीक्षण 'नेचर न्यूरोसायन्स' या नियतकालिकात प्रसिद्ध झाले आहे. याबाबतचा एक सविस्तर अभ्यास प्रसिद्ध झाला असून, करोनाचा शरीराच्या विविध अवयवांपर्यंत कसा जातो याबाबतची निरीक्षणे नोंदवण्यात आली आहेत. वास, चव नसणे, डोकेदुखी, थकवा अशा प्रकारची लक्षणे संबंधित रुग्णाला दिसू लागतात. थेट मेंदूपर्यंत करोना पोहोचल्यानेच हा त्रास होत असल्याचे अभ्यास सांगतो. वाचा: 'सावध राहा' करोनावरील लस अमेरिकेत नागरिकांना लवकरच दिली जाणार आहे. या परिस्थितीचा फायदा काही गुन्हेगार घेऊ शकतात. त्यामुळे नागरिकांनी सावधानता बाळगावी असे, आवाहन 'फेडरल इन्व्हेस्टिगेशन ऑफ ब्यूरो'ने केले आहे. फायझर, मॉडर्ना आदी कंपन्यांच्या लस वितरीत करण्यासाठी समांतर यंत्रणा काही बोगस वैद्यकीय क्षेत्राकडून उभी राहण्याची शक्यता आहे. त्या पार्श्वभूमीवर सावधानता बाळगण्याचे आवाहन करण्यात आले आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2KMvlqW