पाकिस्तानमध्ये अराजक स्थिती! लष्कराविरोधात पोलिसांचे बंड?

इस्लामाबाद: पाकिस्तानचे माजी पंतप्रधान नवाझ शरीफ यांचे जावई आणि पीएमएल-एन पक्षाच्या नेत्या मरियम नवाझ यांचे पती सफदर अवान यांच्या अटकेनंतर आता पाकिस्तानमध्ये वेगवान घडामोडी घडू लागल्या आहेत. पाकिस्तानच्या सिंध प्रांतातील पोलिसांनी लष्कराविरोधात आवाज उठवण्यास सुरुवात केली आहे. सिंध प्रांतातील जवळपास ७० अधिकारी सामुहीक सुट्टीवर गेले आहेत. जाणून घेऊयात नेमकं काय घडलं पाकिस्तानमध्ये.... पाकिस्तानच्या सिंध प्रांताची राजधानी कराचीमध्ये ११ विरोधी पक्षांच्या ‘पाकिस्तान डेमोक्रेटिक मुव्हमेंट’ची(PDM) १८ ऑक्टोबर रोजी दुसरी सभा झाली. या सभेत मरियम नवाझ यांनी इम्रान खान यांच्यावर जोरदार टीका करताना भेकड आणि कळसुत्री सरकार असल्याचे म्हटले होते. इम्रान खान आपले अपयश लपवण्यासाठी लष्कराच्या मागे लपत असल्याचे त्यांनी सांगितले. त्याआधी गुंजावाला येथे झालेल्या 'पीडीएम'च्या पहिल्या सभेतही नवाझ शरीफ यांनी इम्रान खान यांच्यावर सडकून टीका केली होती. वाचा: मरियम यांचे पती सफदर यांना अटक कॅप्टन (निवृत्त) सफदर यांना अटक केल्यानंतर पाकिस्तानमध्ये खळबळ माजली. अटकेची कारवाई लष्कराने केली असल्याचा आरोप करण्यात आला. पाकिस्तानी लष्कराच्या अधिकाऱ्यांनी १८ ऑक्टोबर रोजी सिंध प्रांताचे आयजीपी मुश्ताक महार यांचे अपहरण करून बळजबरीने सफदर यांच्याविरोधातील एफआयआरवर स्वाक्षरी करण्यास भाग पाडले असल्याचा आरोप करण्यात येत आहे. एफआयआरवर स्वाक्षरी करणारे आयजीपी मुश्ताक महार सुट्टीवर गेल्यामुळे या आरोपांना अधिकच बळ मिळाले. अपहरण केल्यामुळे मुश्ताक महार कमालीचे दुखावले असून त्यांनी सुट्टीवर जाण्याचा निर्णय घेतला. त्यानंतर जवळपास ७० वरिष्ठ पोलीस अधिकारी सुट्टीवर गेले आहेत. वाचा: सिंध सरकारला अटकेची कल्पनाच नाही विरोधी पक्षनेते बिलावल भुट्टो यांनी पाकिस्तान लष्करप्रमुख जनरल बाजवा आणि आयएसआय प्रमुखांसोबत चर्चा केली. सिंध प्रांतात बिलावल भुट्टो यांच्या पक्षाची सत्ता आहे. स्थानिक सरकारला कोणतीही कल्पना न देता सुरक्षा यंत्रणांनीही कारवाई केली असल्याचा आरोप भुट्टो यांनी केला होता. सफदर यांची अटक चुकीची असून या प्रकारामुळे लष्कराबद्दल असलेली विश्वसनीयता धोक्यात येईल असेही भुट्टो यांनी बाजवा यांना सांगितले. वाचा: वाचा: बाजवा यांचे चौकशीचे आदेश पाकिस्तान लष्करप्रमुख जनरल बाजवा यांनी या अटकेच्या कारवाईच्या चौकशीचे आदेश दिले आहेत. कराचीतील कॉप्स कमांडरला याबाबतचा चौकशी अहवाल तातडीने सुपूर्द करण्याची सूचना बाजवा यांनी केली आहे. बाजवा यांनी चौकशीचे आदेश दिल्यामुळे सिंध प्रांताचे आयजीपी यांनी सुट्टीवर जाण्याचा निर्णय पुढे ढकलला असून इतर अधिकाऱ्यांनी सुट्टीचा अर्ज मागे घेण्यास सांगितला आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2IR6lOs