महायुद्धाची चाहुल? आर्मेनिया-अजरबैझान युद्धात 'हा' देश उतरणार!

अंकारा/येरेवान/बाकू: आर्मेनिया आणि अजरबैझान दरम्यानचे युद्ध दोन आठवड्यानंतरही थांबले नाही. दोन्ही देशांकडून हल्ले सुरू आहेत. या युद्धामुळे आता तिसरे महायुद्ध भडकण्याची भीती व्यक्त केली जात आहे. आतापर्यंत अप्रत्यक्षपणे सहभागी असणाऱ्या तुर्कीने थेट युद्धात उतरण्याची तयारी असल्याचे म्हटले आहे. अजरबैझानने विनंती केल्यास तुर्कीचे त्यांच्या बाजूने लढण्यास तयार असल्याचे तुर्की सरकारने म्हटले आहे. रशियाचे शेजारी देश असलेले अजरबैझान आणि आार्मेनियात नागोर्नो-कारबाख भाग ताब्यात घेण्यावरून युद्ध सुरू झाले आहे. तुर्कीचे उपराष्ट्रपती फौत ओकताय यांनी सांगितले की, अजरबैझानच्यावतीने सैन्य मदतीची विनंती केल्यास तुर्की आपले सैन्य आणि इतर मदत देण्यापासून मागे हटणार नाही. आतापर्यंत अजरबैझान अशा प्रकारची विनंती केली नसल्याचेही त्यांनी स्पष्ट केले. तुर्कीने अजरबैझानला आपला पाठिंबा व्यक्त केला आहे. आर्मेनिया हा अजरबैझानच्या जमिनीवर ताबा मिळवण्याचा प्रयत्न करत असल्याचा आरोपही त्यांनी केला. आर्मेनिया आणि अजरबैझान या दोन देशांमध्ये मध्यस्थी करण्याचा प्रयत्न रशियाने केला होता. मात्र, ही मध्यस्थी अयशस्वी ठरली. शस्त्रसंधी मोडल्याचा आरोप करत दोन्ही देशांनी पुन्हा युद्ध सुरू केले. त्यामुळे रशियाच्या प्रयत्नांना धक्का बसला. हे दोन्ही देश यापूर्वीच्या सोव्हिएत महासंघाचे घटक देश होते. वाचा: फ्रान्स, रशिया आणि अमेरिकेवर टीका सीएनएनसोबत केलेल्या चर्चेत तुर्कीचे उपराष्ट्रपती फौत ओकताय यांनी फ्रान्स, रशिया आणि अमेरिकेवर टीका केली. नागोर्नो-कारबाख वाद संपुष्टात यावा अशी या देशांची इच्छा नसल्याचा आरोप त्यांनी केला. हे देश आर्मेनियाची राजकीय आणि लष्करी मदत करत असल्याचा आरोप त्यांनी केला. या दरम्यान, आर्मेनियाच्या ताब्यातून आणखी २१ गावांची मुक्त केली असल्याचा दावा अजरबैझानने केला आहे. आतापर्यंतच्या लढाईत १३० गावे, ठिकाणांना आर्मेनियाच्या ताब्यातून सोडवले असल्याचे अजरबैझानने म्हटले आहे. तर, आर्मेनियाने हा दावा फेटाळून लावला आहे. आर्मेनियाचे पंतप्रधान निकोल पशिनयान यांनी सांगितले की, नागोर्नो-काराबाख आणि त्या जवळच्या परिसरात सुरू असलेली लढाई आता राजकीय चर्चेतून थांबवता येणार नाही. वाचा: तुर्की, पाकिस्तानने अजरबैझानचे समर्थन केले आहे. तुर्कीने मागील वर्षी अजरबैझानसोबत १० वेळेस संयुक्त युद्धसराव केला आहे. अजरबैझानमध्ये तुर्कीला कायमस्वरूपी लष्करी तळ उभारायचा असल्याचीही चर्चा सुरू आहे. तुर्कीकडून या युद्धात अजरबैझानला शस्त्र पुरवठा करण्यात आला असल्याचे म्हटले जाते. तर, तुर्कीने आपले एफ-१६ हे लढाऊ विमान अजरबैझानला दिले असल्याचा दावा आर्मेनियाने केला आहे. त्याआधी फ्रान्सचे राष्ट्राध्यक्ष मॅक्रॉन यांनी तुर्कीच्या मदतीने अजरबैझानमध्ये आयएसचे दहशतवादी शिरले असल्याचा आरोप केला होता. वाचा: आर्मेनिया आणि अजरबैझानमधील युद्धात तुर्की उतरल्यास रशियाही युद्धात उतरणार असल्याची शक्यता वर्तवण्यात येत आहे. रशियाने आर्मिनियाला पाठिंबा दिला आहे. तर, दुसरीकडे अजरबैझानसोबत नाटो, तुर्की आणि इस्रायलसारखे देश आहेत. आर्मेनिया आणि रशियात संरक्षण करार आहे. त्यामुळे आर्मेनियाच्या भूमीवर युद्ध सुरू झाल्यानंतर रशिया या करारानुसार मदतीसाठी धावून येऊ शकतो. तुर्की आणि रशिया युद्धात उतरल्यास तिसऱ्या महायुद्धाला तोंड फुटण्याची भीती व्यक्त केली जात आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/35hLwTQ