सेन्सेक्स सुस्साट ! तासाभरात गुंतवणूकदारांची जोरदार कमाई

मुंबई : आशियातील इतर भांडवली बाजारातील तेजीच्या लाटेवर स्वर होत आज सेन्सेक्स आणि निफ्टीने जोरदार झेप घेतली आहे. बँका, वित्त संस्थाच्या शेअरमधील खरेदीने सेन्सेक्स ४५० अंकांनी उसळला आहे.राष्ट्रीय शेअर बाजाराचा निफ्टी ११५ अंकांनी वधारला आहे. अवघ्या तासाभरात गुंतवणूकदारांनी लाखभर कोटींची कमाई केली आहे. करोनाची स्थिती आणि अमेरिका निवडणूक याकडे गुंतवणूकदारांचे लक्ष लागले असल्याचे शेअर बाजार विश्लेषकांनी सांगितले. अमेरिकेन संसदेने दुसऱ्या आर्थिक पॅकेज जाहीर करण्याची तयारी दर्शवली असून यासाठी ४८ तासांची डेडलाइन ठरवण्यात आली आहे. मागील काही दिवस या घडामोडीचा भांडवली बाजारांवर परिणाम झाला होता. आजच्या सत्रात आयसीआयसीआय बँक, एचडीएफसी, रिलायन्स इंडस्ट्रीज, एचडीएफसी बँक, ऍक्सिस बँक, कोटक महिंद्रा बँक, एसबीआय, एचसीएसल टेक, आयटीसी, ओएनजीसी, इंडसइंड बँक हे शेअर वधारले आहेत. तर वोडाफोन आयडिया, यूपीएल लिमिटेड, टीसीएस या शेअरमध्ये घसरण झाली आहे. सध्या सेन्सेक्स ४६३ अंकांनी वधारला असून तो ४०४४६ अंकांवर ट्रेड करत आहे. निफ्टी ११४ अंकांनी वाढला असून ११८७७ अंकांवर आहे. गुंतवणूकदारांनी केलेल्या सावध खरेदीने शुक्रवारी मुंबई शेअर बाजाराचा सेन्सेक्स २३५ अंकांनी वधारला आणि ३९९६३ अंकावर बंद झाला होता. राष्ट्रीय शेअर बाजाराचा निफ्टी ७० अंकांनी वधारून ११७५० अंकावर स्थिरावला होता. या तेजीने गुंतवणूकदारांची किमान ८० हजार कोटींची भरपाई झाली होती. जागतिक नाणेनिधीने भारतीय अर्थव्यवस्था चालू आर्थिक वर्षात १०.३ टक्के आक्रसणार हे केलेले भाकित आणि त्यापाठोपाठ भारताचा दरडोई जीडीपी हा बांगलादेशच्या दरडोई जीडीपीपेक्षाही खाली जाण्याची वर्तवलेली शक्यता यामुळे गुरुवारपासून देशाच्या अर्थव्यवस्थेबाबत अगदी सर्वसामान्यांच्या मनात भीती निर्माण होत आहे. मात्र काही अर्थतज्ज्ञांनी हे आकडे फारसे मनावर घ्यायचे नसतात, त्याचवेळी धोरणकर्त्यांनी गाफील राहू नये, असे मत व्यक्त केले आहे. भारतीय अर्थव्यवस्थेची मूलतत्त्वे खंबीर असून देशाने जागतिक बाजारपेठांतून आपला ठसा उमटवला आहे. आपण एकाचवेळी देशांतर्गत कामकाज, उद्योगवृद्धी, कृषी व सहकृषी उद्योग, सामाजिक सुरक्षितता, सायबर सुरक्षा, आंतरराष्ट्रीय संबंध, निर्यात-आयात, विदेशी चलन व्यवहार, नागरिकांचे आरोग्य, सीमांवरील शांतता, देशांतर्गत शांतता व सौहार्द या सर्व आघाड्यांवर निर्णय घेत आहोत. या कंपन्या करणार तिमाही निकालांची घोषणा सध्या बाजारात कॉर्पोरेटकडून दुसऱ्या तिमाही निकालांची घोषणा केली जात आहे. त्यामुळे बाजारात उत्साहाचे वातावरण आहे. आज एचडीएफसी लाईफ, ब्रिटानिया इंडस्ट्रीज, एससीसी, एल अँड टी टेक्नॉलॉजी, बँक ऑफ महाराष्ट्र, सीबीएस बँक आदी कंपन्या आपले तिमाही निकाल घोषीत करणार आहेत.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/37mLX1M