धक्कादायक! ४१ तासांपूर्वी जन्मलेल्या गोंडस मुलीचा निर्दयी मातेने गळा आवळला

म. टा. प्रतिनिधी, : केवळ ४१ तासांपूर्वी जन्मलेल्या बालिकेचा आईनेच गळा आवळला. उपचारादरम्यान या दुर्दैवी बालिकेचा मृत्यू झाला. सांगलीतील सिव्हिल हॉस्पिटलमध्ये हा धक्कादायक प्रकार घडला. शनिवारी रात्री बालिकेचा गळा आवळल्याचा प्रकार लक्षात येताच तिच्यावर उपचार सुरू करण्यात आले होते. उपचारादरम्यान रविवारी रात्री तिचा मृत्यू झाला. या प्रकरणी विश्रामबाग पोलिस ठाण्यात आईविरोधात खुनाचा गुन्हा दाखल करण्यात आला असून, सुमित्रा गंगाप्पा जुट्टी (वय ३०, रा. यलापूर, जि. बेळगाव) असे निर्दयी आईचे नाव आहे. विश्रामबाग पोलिसांनी दिलेल्या माहितीनुसार, सुमित्रा जुट्टी ही महिला पाच दिवसांपूर्वी प्रसुतीसाठी सांगलीतील सिव्हिल हॉस्पिटलमध्ये दाखल झाली होती. ४१ तासांपूर्वी तिने एका गोंडस मुलीला जन्म दिला. शनिवारी रात्री सुमित्राने हॉस्पिटलमध्येच बालिकेचा गळा आवळला. हॉस्पिटलमध्ये उपचारासाठी दाखल असलेल्या एका महिलेने हा प्रकार पाहिला. तिने याची माहिती वॉर्डमधील डॉक्टरांना दिली. त्यांनतर परिचारिकांनी उपचारासाठी बालिकेला ताब्यात घेतले. नवजात बालिकेच्या गळ्यावर हाताचे व्रण आढळले. याबाबत सुमित्राला विचारणा केली असता, तिने उडवाउडवीची उत्तरे दिली. हॉस्पिटलमधील डॉक्टरांनी तातडीने बालिकेवर उपचार सुरू केले. मात्र, उपचार सुरू असताना रविवारी रात्री बालिकेचा मृत्यू झाला. या प्रकरणी रूग्णालय प्रशासनाने विश्रामबाग पोलिसांना माहिती दिली. पोलिसांनी मध्यरात्री सुमित्रावर खुनाचा गुन्हा दाखल केला असून, तिची चौकशी सुरू आहे. तिने पोटच्या मुलीचा गळा का आवळला, याचे कारण अद्याप स्पष्ट झालेले नाही.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3jcO5eG