इंधन स्वस्ताई ; पेट्रोल-डिझेलमध्ये झाली इतकी कपात

मुंबई : जागतिक बाजारात कच्च्या तेलाच्या किमतींमधील घसरणीमुळे देशांतर्गत इंधन दरात कपात सुरु आहे. आज शुक्रवारी कंपन्यांनी पेट्रोल आणि डिझेलमध्ये मोठी कपात केली आहे. याआधी पेट्रोलियम कंपन्यांनी सोमवार, मंगळवार आणि गुरुवारी पेट्रोल आणि डिझेल दरात कपात केली होती.आज शुक्रवारी कंपन्यांनी डिझेल दरात ३७ पैसे कपात केली आहे. तर पेट्रोलच्या किमतीत २६ पैसे कपात करण्यात आली आहे. या आठवड्यात झालेल्या दर कपातीने मुंबईत पेट्रोल ८८ रुपयांखाली आले आहे. डिझेल दर ७९ रुपयांखाली आला आहे. आजच्या दर कपातीने मुंबईत पेट्रोल दर प्रती लीटर ८१.१४ रुपये झाला आहे. डिझेल ७८.४८ रुपये झाले आहे. दिल्लीत आजचा पेट्रोलचा भाव ८१.१४ रुपये असून डिझेलचा भाव ७२.०२ रुपये आहे. चेन्नईत पेट्रोल ८४.२१ रुपये असून डिझेल ७७.४० रुपये झाला आहे. कोलकात्यात पेट्रोल ८२.६७ रुपये आहे. डिझेल ७५.५२ रुपये प्रती लीटरपर्यंत घसरले आहेत. जागतिक बाजारात कच्च्या तेलाच्या किमतींमधील घसरणीमुळे देशांतर्गत इंधन दरात कपात सुरु आहे. याआधी गुरुवारी पेट्रोल आणि डिझेल १३ ते २० पैशांनी स्वस्त झाले होते. बुधवारी इंधन दर स्थिर ठेवले होते. मंगळवारी कंपन्यांनी पेट्रोल दरात १७ पैसे आणि डिझेलमध्ये २२ पैशांची कपात केली. तर सोमवारी पेट्रोल १४ पैसे आणि डिझेल १५ पैशांनी स्वस्त झाले होते. दरम्यान, इंधन मागणी वाढली असल्याचे सप्टेंबरच्या पहिल्या पंधरवड्यात दिसून आले आहे. पेट्रोलची विक्रीचे प्रमाण करोना पूर्व स्थितीला गेले आहे. १ ते १५ सप्टेंबर या या काळात पेट्रोल विक्रीत २.२ टक्के वाढ झाली. ९६५००० टन पेट्रोलचा देशभरात या कालावधीत खप झाला. डिझेल मात्र तुलनेने कमी विक्री झाली. १ ते १५ सप्टेंबर या काळात २१३०००० टन डिझेलची विक्री झाली. पेट्रोलियम कंपन्यांनी मागील सहा दिवसांत चार वेळा इंधन दर कमी केल्यानं ग्राहकांना मोठा दिलासा मिळाला आहे.देशात पेट्रोल आणि डिझेल नियंत्रणमुक्त आहेत. २०१० मध्ये सरकारने पेट्रोल नियंत्रणमुक्त केले होते. तर २०१४ मध्ये डिझेल दर नियंत्रणमुक्त करण्यात आले.१६ मार्चपासून पेट्रोलियम कंपन्यांनी ८३ दिवस पेट्रोल आणि डिझेलचे दर स्थिर ठेवले होते. ३० जुलै रोजी दिल्ली सरकारने डिझेलमध्ये ८.३६ रुपये शुल्क कपात केली. त्यामुळे दिल्लीत डिझेलचा दर प्रती लीटर ७३.५६ रुपये प्रती लीटर झाला होता.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/33F72B5