बंद वीज प्रकल्पात ‘तिची’ प्रसूती; कर्मचाऱ्यांना प्रतीक्षा ‘डिस्चार्ज’ची

: एकीकडे स्वत:च्या जीवाची भिती तर दुसरीकडे तिच्या पिलांची चिंता. अशा परिस्थिती गेले पंधरा दिवस अकोले तालुक्यातील कोदणी वीज प्रकल्पातील कर्मचाऱ्यांचे काम सुरू आहे. कारण या प्रकल्पात एका बिबट्याच्या मादीची प्रसूती झाली असून तिने चार पिल्लांना जन्म दिला आहे. पिंजरा लावून तिला पकडायचे झाले तर तिची व पिल्लांची ताटातूट होण्याची भिती. त्यामुळे कधी एकदा ती पिल्लांना घेऊन येथून निघून जाते, याची वीज कर्मचारी आणि वन विभागाच्या अधिकाऱ्यांनाही प्रतीक्षा आहे. भंडारदरा प्रकल्पातंर्गत कोदणी जलविद्युत प्रकल्प आहे. सध्या या प्रकल्पातून वीज निर्मिती बंद आहे. इतर कामकाज मात्र सुरू असल्याने २१ अधिकारी-कर्मचारी तेथे दिवसरात्र कार्यरत आहेत. ६ ऑगस्ट रोजी या प्रकल्पात एका बिबिट्याने प्रवेश केला. तेव्हापासून कर्मचाऱ्यांमध्ये घबराटीचे वातावरण आहे. यथावकाश बिबट्याने चार पिलांना जन्म दिल्याचे लक्षात आले. पिल्लांच्या संगोपणासाठी मादी बिबट्याचा या परिसरातील वावर प्रकल्पाच्या सीसीटीव्हीमध्ये चित्रित झाला आहे. त्यामुळे कर्मचाऱ्यांची भिती आणखीच वाढली. त्यांनी वन विभागाला कळविले. वनविभागाचे अधिकारी आले. त्यांनी पिंजरा लावला. मात्र, त्यात अडकला नाही. मात्र, असे करणे पिल्लांच्या दुष्टीने योग नसल्याने काळजी घेत काम करण्याचे सूचना वनविभागाने प्रकल्पातील कर्मचाऱ्यांना केल्या. रात्रपाळीच्या कर्मचाऱ्यांना विशेष काळजी घेण्यास सांगण्यात आले. त्यामुळे दुपारी ४ नंतरच प्रकल्पात शुकशुकाट होतो. रात्रपाळीचे कर्मचारी कॅबिन बंद करून बसतात. पंधरा दिवसांत मादी पिल्लांना घेऊन जाते. त्यामुळे प्रकल्पाचे गेट बंद न करता उघडे ठेवून त्यांना जाता येईल, याची दक्षता घेण्याच्या सूचना वनविभागाने प्रकल्पातील कर्मचाऱ्यांना दिल्या आहेत. आता सर्वजण आई आणि पिल्लांच्या तेथून जाण्याची वाट पाहत आहेत. रात्रपाळीच्या कर्मचाऱ्यांना दररोज रात्री सीसीटीव्हीमध्ये बिबट्याच्या वावराची दृष्य पहायला मिळतात. परिसरात प्रवरा नदी आणि दाट झाडेझुडपे आहेत. त्यामुळे प्रकल्पातील आणि वसाहतीतील कर्मचारीही जीव मुठीत घेऊन दिवस काढत आहेत. वनक्षेत्रपाल जी. जी. गोंदके, डॉटसन वीज केंद्राचे अधिकारी राजेंद्र जाधव यांनी सर्व कर्मचाऱ्यांना सूचना दिल्या आहेत. स्वत:ची काळजी घेतानाच गेट उघडे ठेवून बिबट्याच्या सुखरूप परतीचा मार्ग मोकळा ठेवण्यास सांगण्यात आले आहे. सीसीटीव्ही द्वारे हालचालींवर नजर ठेवली जात आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3hyXZaI