शिवसेना खासदार श्रीकांत शिंदेंच्या बंगल्यासमोरच खड्डे; मनसेने केली पोलखोल

ठाणे: ट्वीटरवर मागणी आणि फॉलोअप करणाऱ्या आमदारांनी प्रत्यक्षात कल्याण-शीळ रोडवर फेरफटका मारावा, म्हणजे या रस्त्यावर कुठे आणि कसं काम सुरू आहे हे त्यांना कळेल, अशी प्रतिक्रिया व्यक्त करणाऱ्या खासदार यांची मनसेने पोलखोल केली आहे. श्रीकांत शिंदे यांच्या डोंबिवलीतील बंगल्यासमोरच खड्ड्याचं साम्राज्य पसरल्याचं सांगत या बंगल्यासमोरच्या खड्ड्यांचा व्हिडिओच मनसेने व्हायरल केला आहे. त्यामुळे खड्डे भरण्याची कामे कुठे सुरू आहेत? असा सवाल कल्याण-डोंबिवलीतील नागरिक विचारत आहेत. मुख्यमंत्री उद्धव ठाकरे हे ठाण्यात येणार असल्याने नगरविकास मंत्री एकनाथ शिंदे यांनी जागेवर उभं राहून खड्डे बुजवून घेतले होते. त्यामुळे मनसेचे आमदार यांनी मुख्यमंत्र्यांना कल्याण-डोंबिवलीत येण्याचं निमंत्रण दिलं होतं. मुख्यमंत्री कल्याण-डोंबिवलीत आले तर येथील रस्तेही खड्डेमुक्त होतील, असा खोचक टोला राजू पाटील यांनी लगावला होता. त्यावर शिवसेनेचे स्थानिक खासदार डॉ. श्रीकांत शिंदे यांनी ट्वीटरवर मागणी आणि फॉलोअप करणाऱ्या आमदारांनी प्रत्यक्षात कल्याण-शीळ रोडवर फेरफटका मारावा, म्हणजे या रस्त्यावर कुठे आणि कसं काम सुरू आहे हे त्यांना कळेल, अशी टीका केली होती. त्याला राजू पाटील यांनी जशास तसे उत्तर दिलं आहे. शिंदे यांचं शिळ-फाट्यावर जाण्याचं आव्हान स्वीकारून राजू पाटील यांनी मीडियाला सोबत घेऊन थेट कल्याण-शीळ रोड गाठला होता. यावेळी त्यांनी कल्याण-शीळ रोडवर खड्डे बुजवण्याचं काम सुरू नसल्याचं सांगतानाच या रोडवर प्रचंड खड्डे पडल्याचंही निदर्शनास आणून दिलं. एवढेच नव्हे तर डोंबिवलीतील खासदार शिंदे यांच्या बंगल्यासमोरच खड्ड्याचं साम्राज्य पसरल्याचंही दाखवून दिलं. खासदार शिंदे डोंबिवलीत येतात तेव्हा याच बंगल्यात मुक्कामाला असतात. या बंगल्याच्याबाहेर आणि बंगल्यालगतच्या मुख्य रस्त्यावरही खड्डे पडले आहेत. त्यामुळे त्यांनी खड्डे भरावे. रस्ते नीट करावेत. खड्ड्याचं राजकारण करू नये. कल्याण-डोंबिवलीकरांना खड्डयातून मुक्त करावं, असा टोला राजू पाटील यांनी लगावला आहे. मी याच मतदारसंघात राहतो. या मतदारसंघाची मला संपूर्ण माहिती आहे. मला या मतदारसंघात फेरफटका मारायची गरज नाही. हे माझं घर आहे. इथे मी पार्ट टाइम येत नाही, असा टोला लगावतानाच आपल्या बंगल्यासमोरी खड्ड्यांचं तरी बघा, असा चिमटाही त्यांनी काढला आहे.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/2EoanvY