: रस्त्यावर हातात चाकू घेऊन दहशत निर्माण करणाऱ्या व्यक्तीला पकडण्यास गेलेल्या पोलिसांवरच संबंधित व्यक्तीने हल्ला केला. या घटनेत एक पोलीस अधिकार व कर्मचारी किरकोळ जखमी झाले आहेत. काल, शुक्रवारी कर्जत येथे ही घटना घडली आहे. याप्रकरणी काल रात्री उशीरा विलास अबलुक्या काळे (रा.कर्जत) याच्या विरोधात कर्जत पोलीस ठाण्यात खुनाच्या प्रयत्नाचा गुन्हा दाखल झाला आहे. दरम्यान, आरोपी काळे याला पोलिसांनी ताब्यात घेतले आहे. कर्जत येथील जिल्हा सहकारी बँकेच्यासमोर आरोपी काळे हा गेल्या दोन ते तीन दिवसांपासून येऊन हातामध्ये चाकू घेऊन दहशत निर्माण करीत होता. याप्रकारामुळे बँकेच्या कर्मचाऱ्यांमध्ये भितीचे वातावरण होते. याबाबत पोलिसांना माहिती देण्यात आली. त्यातच काल सायंकाळी साडेचारच्या सुमारास काळे हा बँकेसमोर आल्याचे पोलिसांना समजले. त्यानुसार पोलीस उपविभागीय अधिकारी संजय सातव यांच्यासह पोलीस कर्मचारी बळीराम गोपीनाथ काकडे व एक होमगार्ड हे घटनास्थळावर गेले. त्यावेळी काळे हा बँकेसमोरील रस्त्यावर हातामध्ये धारदार चाकू घेऊन दहशत निर्माण करीत असल्याचे पोलिसांच्या निर्देशनास आले. तेव्हा पोलीस कर्मचारी बळीराम काकडे यांनी काळे याला हातामधील चाकू खाली टाकून पोलिसांच्या गाडीत बसण्यात सांगितले. मात्र, काळे हा गाडीत न बसता काकडे यांच्या अंगावर धावून गेला. तसेच त्याने त्याच्या हातातील चाकुने काकडे यांच्या छातीवर वार करण्याचा प्रयत्न केला. चाकुचा वार चुकवण्याचा प्रयत्न करताना काकडे यांच्या उजव्या हाताला गंभीर जखमी झाली. तसेच आरोपी काळे याने घटनास्थळावर असलेले पोलीस अधिकारी सातव यांच्यावर हल्ला करण्याचा प्रयत्न केला. त्यामध्ये सातव यांनाही किरकोळ जखमी झाली आहे. याप्रकरणी पोलिसांनी आरोपी काळे याला ताब्यात घेतले असून त्याच्यावर कर्जत पोलीस ठाण्यात गुन्हा दाखल केला आहे. पुढील तपास पोलीस निरीक्षक गायकवाड हे करीत आहेत.


from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/3mKsfm2